政Whats噏：葉劉淑儀「派福利」　坐樹幹同市民拜早年

儘管未到大年初一，但陸續有政界人士透過社交平台向市民拜早年。身兼行政會議召集人嘅議員葉劉淑儀依舊維持一貫做法，拍攝應節相片向網民「派福利」，並隨圖附上「送虎迎兔」四個大字，藉此恭祝大家團圓幸福。

今次嘅賀年相片，葉劉輕倚林莽，背後一片花團錦簇，予人春意盎然之感。葉劉話大除夕年三十係中國人嘅大日子，當然係一家人食團年飯、開懷團聚。隨社會邁向復常，佢話港鐵今晚(21日)會提供通宵列車服務，建議團年飯後大家不妨行下花市，感受過年熱鬧氣氛。

另外，議員林琳就趁年三十出席漁農關愛隊嘅活動，聯同由漁農自然護理署助理署長(漁業)黎存志率領嘅義工隊，向基層家庭送上有魚、菜、米嘅新春福袋，仲祝大家年年有餘呀！