政Whats噏：王逸戰入獄3個月　忙於閱讀話要提升自己

前學生組織「賢學思政」召集人王逸戰因違反《港區國安法》，喺舊年10月下旬被判監36個月。入獄差唔多3個月，佢忙於讀書同閱讀，再加上佢喺獄中要工作，所以呢排都比較低調。

王逸戰嘅社交平台日前貼文，話佢希望喺獄中提升自己，亦話佢喺下月13日就係喺獄中過第二個生日嘞！事關佢舊年嘅生日係喺還押中過嘅。

包括王逸戰在內4名「賢學思政」成員，因喺2020年10月25日至2021年6月16日期間，7次喺唔同地區擺街站呼籲他人對抗政權，被控違反《港區國安法》中嘅串謀煽動他人實施顛覆國家政權罪。4人舊年喺區域法院認罪，而喺10下旬被判刑，其中3人被判監30個月至36個月，另一人則被判入教導所，王逸戰被判監禁36個月。