適逢農曆新年，周圍都有唔少慶祝活動，今日(22日)係大年初一，自然要舞龍舞獅迎新歲啦，一班議員都有去到銅鑼灣鬧市，向市民大眾拜年！

正所謂「龍獅舞動迎新歲、靈兔躍動賀新春」，議員謝偉俊、吳秋北同容海恩今日就一齊參加喺銅鑼灣羅素街嘅舞龍獅活動，期間進行燒花炮、龍獅點睛、將「福」黏喺壁報板等儀式，謝偉俊身穿黃色唐裝應節，祝大家「心身康泰生活愉快」，吳秋北祝大家「政通人和身體健康」，容海恩就祝大家「萬事勝意大家都好」，喺點睛期間，仲連祝大家「金龍點睛、氣勢強勁、財源廣進、步步高升」！

搞完一輪儀式之後，龍獅就開始舞動啦！偃旗息鼓之後，有唔少人都摸龍獅嚟祈求新一年行好運，吳秋北都唔例外喎，仲跳起身摸龍獅尾添！