政Whats噏:疫後重遊宿霧滿布貧民區 江玉歡:慘不忍睹

2023年01月24日 16:40
東網電視
更多新聞短片
江玉歡話疫後政府資源點運用,對復甦有好大影響。
疫情3年,唔少市民都趁農曆新年假期出外鬆下,議員江玉歡(Doreen)亦喺3年重遊菲律賓宿霧,佢竟然用滿目瘡痍嚟形容,仲話慘不忍睹,亦都令佢諗到疫後政府資源點運用,直接影響復甦。
Doreen話因為鍾意陽光與海灘,所以以前經常去宿霧,淺水嘅沙灘有好多熱帶魚,旅費亦唔會使太多。事隔3年後,Doreen近日重遊舊地,話感受良多。究竟發生乜嘢事?Doreen今日(24日)喺社交平台貼文,話無論係Mactan島同Cebu市內,到處都見到用鋅鐵同木搭建嘅貧民區,咪以為Mactan係旅遊區會好啲,實際上都係延綿不絕嘅木屋區,衞生情況慘不忍睹。
Cebu市內嘅情況唔見得比Mactan好,Doreen話雖然喺最豪華嘅商場Ayala亦見到有好多名店,市內亦有第一間米芝連食店,但高檔公寓十室九空,高尚商業區同木屋區為鄰,佢覺得好諷刺,而全市最旺嘅竟然係Mactan島上嘅午夜露天disco,嗰度成為當地年輕人嘅蒲點,周圍都見到酒醉青年。
Doreen話3年後見到宿霧嘅滿目瘡痍,就算係佢經常入住嘅酒店都破舊不堪。佢話宿霧係菲律賓第2大城市,人均生產總值每月只有1,200港元,疫情對呢個第2大城市同嗰度嘅旅遊業衝擊有如巨浪。
睇到其他城市嘅發展同問題,佢話對自己有唔少啟發,佢認為天災固然無情,但人係可以改寫命運。佢話疫後政府資源有限,點樣投放,先挽救邊啲人,先後緩急稍有差池,對復甦有影響。