政Whats噏:兔年經濟挑戰大 玄學家:市民要有勒緊褲頭嘅準備

2023年01月24日 20:21
東網電視
更多新聞短片
兔年香港經濟遇好大嘅挑戰。
隨住舊年年尾政府陸續放寬防疫措施,唔少人都期望踏入新一年本港能夠徹底復常,各行各業重拾生機、政通人和。儘管願望很豐滿,但現實可能很骨感。有玄學家推算,即使虎年遠去,香港喺兔年仍要面對唔少挑戰,尤其喺經濟方面,市民要有「勒緊褲頭」嘅心理準備,仲話至少要捱到年尾,先會出現轉機。
玄學家陳法齊話從梅花易嘅卦象中,本港仍處於「受泄」嘅局面,即係支出大而收入少,所以今年嘅經濟基本上係唔好,尤其是春、夏兩季,真係「好唔掂」。至於經濟轉機就唔係無,但起碼都要等到秋季先至會出現。之不過,出口貿易方面可能有好消息,因為外國對香港施加嘅限制或略有放鬆,但對官員實施嘅制裁就唔會撤除。
咁今年政局嘅變化大唔大呢?陳師傅唔會有大變化,依然係建制陣營嘅天下,即使喺夏天會有些少反對聲音冒起,但去到秋季又會歸於沉寂。外界預料區議會喺年底進行換屆選舉,陳師傅話會有非建議制人士「入閘」,但能唔能夠贏得議席就不容樂觀,畢竟支持非建制陣營嘅選民已經大減。
喺疫情方面,陳師傅話卦象顯示問題唔大,尤其是頭兩季會趨於穩定,但資源消耗嘅情況仍會持續;口罩令今年會取消,但最快都要等到立春之後,又或者元宵節左右。至於有人擔心恢復通關會令到疫情輾轉擴散,陳師傅話卦象顯示呢個情況並唔明顯,甚至乎唔會出現。雖然2023年嘅香港運程唔係咁平坦,但陳師傅強調秋冬打後,會較2022年好,大家毌須太過擔心。不過,風水命理信則有、不信則無,好與壞都唔使太上心。