政Whats噏：林振昇孖林素蔚開地辦　原因竟然係.....

議員「孖頭」開設地區辦事處已經成為新常態。正值大年初四，選委會界別議員林振昇同新界東南直選議員林素蔚同打工仔女拜年，祝大家開工大吉。唔單止咁，佢哋宣布喺2月4日，即係立春當日喺將軍澳開辦議員辦事處添！咦！一個選委會界別，一個係地區直選，睇落大纜都扯唔埋，竟然一齊開地辦？

點解兩人會合作呢？林振昇接受查詢話，早前喺立法會提出「推動職業教育發展，培養人才構建多元出路」嘅議員議案，當時林素蔚都有提出修正案，雙方發覺十分投契。咁啱林素蔚打算開設地辦，就邀請埋佢喇。

林素蔚就話佢哋之所以會一齊開地辦，皆因林振昇住喺馬鞍山，即係林素蔚嘅選區範圍，佢曾幫過林振昇處理屋苑問題，兩個人早有聯絡；加上大家都關注勞工福利，所以就合作開地辦。佢仲話今次係自己第一次同其他議員合作開地辦，希望嚟緊可以一齊處理地區事務同埋基層福利問題。