政Whats噏:水煙口味多易上癮 江玉歡:當局要加強宣傳及執法

2023年01月30日 16:48
東網電視
更多新聞短片
不少年輕人都有食水煙嘅習慣。
有人會認為食水煙時「煙霧瀰漫」,係時髦嘅玩意,之不過,由於水煙有唔同味道及香味,比起傳統嘅香煙更易入口但其禍害其實唔比香煙少。加上水煙同香煙一樣,同受《吸煙(公眾衞生)條例》監管,唔可以喺公眾場所室內吸食。但議員江玉歡就話水煙有害處,仲建議政府要有所行動。
江玉歡近日行過尖沙咀同灣仔區,指見到有愈來愈多設水煙嘅餐廳同酒吧,有時甚至見到客人喺室內食水煙。佢對此感到好好奇,因眼見好多年輕一族都食水煙嘅習慣,於是翻睇醫學雜誌,發現水煙都會上癮,而且食水煙吸入嘅煙草量比普通香煙高出好多倍,容易患上肺癌同食道癌,而且都會有二手煙問題。
既然有咁多問題,咁立法規管咪得囉?江就指唔係要立刻好似英國、馬來西亞同新加坡等地禁止或限制水煙店,但為市民嘅健康著想,政府需要盡快向公眾講解水煙對健康嘅影響,以及嚴格規定同執行餐廳酒吧,只可向18歲或以上人士出售水煙服務及只可喺室外吸食。