政Whats噏：陸瀚民帶鐵路迷參觀立法會　幕後身份令人估唔到

作為民意代表，議員經常要接待各色人等。選委會界別議員陸瀚民今日(31日)喺辦事處遇到一位同學登門造訪，令到佢「真的很興奮」之餘，仲要同對方參觀立法會大樓、請埋食嘢添！到底呢位訪客係乜嘢來頭，可以得到議員嘅殷切招待呢？

其實呢位訪客都頗有知名度，佢就係鐵路迷羅哲琛同學嘞！除此之外仲有一個特別嘅身份，原來佢係陸瀚民嘅表外甥。由於羅係第一次到訪立法會，陸亦一盡長輩嘅責任，向表外甥詳細介紹立法會嘅運作，包括議員嘅日常工作，亦同佢一齊品嘗立法會新餐廳嘅外賣。陸又提到，羅關心時事，亦希望成為記者，故交流咗唔少有關議會嘅生態問題，包括議員點樣監察政府等。而陸最後都話要向青年人多解釋立法會事務，理解議員嘅職責同工作。

2021年，羅哲琛喺屯馬綫通車時接受傳媒訪問期間，唱出自己改編嘅歌「屯馬開通真的很興奮」而廣為人知，其後佢亦經常喺媒體面前曝光。