政Whats噏：垃圾徵費指定袋招標生枝節　議員憂計劃延遲實施

垃圾徵費嘅條例草案喺前年已經通過咗，去到今年年尾計劃正式實施，市民須用指定嘅膠袋同標籤棄置垃圾。就喺計劃日漸逼近之時竟旁生枝節，令到議員擔心政府喺細節方面有否通盤考慮，同埋有關計劃係咪可以如期實施喎。

話說垃圾徵費計劃出咗差池，係有關指定垃圾膠袋嘅招標。政府喺去年6月就指定垃圾膠袋同標籤嘅製造商進行公開招標，但收到嘅26份標書當中，竟然冇一份可以同時符合技術要求同埋招標價，導致有關招標告吹。後來政府重新檢討指定垃圾膠袋嘅規格同標書條款，主要有兩項改動，包括原先政府要求生產工序要喺香港進行，依家就容許喺境外進行；先前為咗環保，規定材質須含百分之50再生塑膠物料，但依家就將比例降至百分之20，改用高密度聚乙烯嘅材質。做咗呢一系列改動，政府預計今年第一季進行招標，第二季批出合約咁話。

對於招標搞到要「補鑊」，今日(31日)立法會嘅相關事務委員會上，好多議員都有意見。議員葛珮帆就話喺香港起膠袋廠要搵土地，興建又要時間，而且成本一定好高，反問出席會議嘅政府代表「你哋唔知咩？」；議員盧偉國都話呢個計劃由第一日開始就唔應該要求生產要喺香港進行，依家搞到要重新招標，簡直係「匪夷所思」咁話，仲有好多議員擔心第二季先至決定用邊個回收商，擔心趕唔切生產或者膠袋數量不足。環境保護署副署長陸嘉健回覆話，當初嘅構想係扶持本地回收商，殊不知成本好高，惟有放棄呢個諗法，但有信心計劃可以趕得切年尾落實嘅。

喺電費、車費都話漲價嘅當下，遲啲再有呢個垃圾徵費，議員都擔心基層市民能否應付，況且垃圾徵費對市民而言係新概念，若未能適應，恐怕胡亂棄置嘅垃圾會充斥天台或後樓梯。陸嘉健回應話，計劃實施後會有6個月嘅適應期，期間希望盡量唔執法，唔會用一大隊人埋伏睇睇邊個違法嘅，主要採取勸喻同教育，之後都會搵團隊做宣傳，而指定垃圾膠袋都會喺一段時間內派畀公屋同三無大廈居民，減少佢哋嘅負擔。

雖然署方代表講得好有自信，但議員郭偉強就希望到計劃真正實施嘅時候官員都可以咁有信心，佢又話依家政府講到明唔會花費大量人力物力執法，擔心此舉反而達唔到徵費嘅目標，建議署方講明邊個時間會開始認真執法咁話。