政Whats噏：邁向疫後復常　林健鋒口罩廠謀轉型

喺疫情初期，本港出現口罩荒，市面上「一罩難求」，經民聯副主席、身兼行會成員嘅議員林健鋒當時就牽頭成立CareHK匯愛口罩廠。時至今日，香港邁向復常，社會討論緊撤銷口罩令呢個最後關卡，林健鋒喺今日(1日)新春團拜亦向大家透露口罩廠要考慮轉型啦。

「回帶」返去2020年3月，口罩廠開幕當日，林健鋒一度感觸落淚，而廠房喺接近3年嘅運作，就不斷嘗試新嘅口罩設計，佢話嚟緊就要睇吓間廠點樣轉型，或考慮做啲環保物品或者塑膠等，至於口罩生產線幾時「光榮結束」就仍未有定案。

林健鋒又提到將會出訪大灣區，可以話疫情3年來第一次上去，期間會到訪東莞、佛山，會見當地領導，探索下有咩機遇，加上自己本身都有廠喺上面，又可趁呢個機會思考一下口罩廠轉型嘅方向，但就因此唔會隨同港府訪問中東啦。