政Whats噏：議員關注動物權益　政府將修例寵物店要為貓植晶片

香港有好多人飼養寵物，有關動物權益嘅議題備受關注，本身都係「貓奴」嘅議員劉國勳，今日(2日)聯同黨友陳克勤及多個關注動物福利嘅團體，喺立法會同漁農自然護理署嘅官員商討動物福利事宜，當中就傾到修訂《公眾衞生(動物及禽鳥)(售賣及繁育)規例》，要將貓納入規管範圍咁話。

之不過，署方話現時需集中處理《防止殘酷對待動物條例》嘅立法工作，因涉及引入照顧者責任，要求飼主等照顧動物，避免遭受痛苦或傷害。但署方就同意從速修改《持牌動物售賣商營業守則》，持牌動物售賣商或寵物店等必須為貓隻植入晶片，有關諮詢工作已完成，會盡快整理落實。

正所謂沒有買賣就沒有傷害，劉國勳話署方好關注網上非法買賣動物嘅情況，已成立專責小組加強打擊，且去信相關嘅網上平台，要求將有關買賣動物內容下架，港方亦會同內地海關密切聯繫，以杜絕不法源頭。至於流浪動物方面，會繼續推動捕捉、絕育同放回嘅做法，話喺元朗同長洲兩個試點中，都達到預期嘅效果。