政Whats噏:會長劉智鵬推中史納高中必修 教聯會員竟唔撐

2023年02月09日 19:06
東網電視
更多新聞短片
身兼教聯會會長嘅議員劉智鵬力推將中史納入高中必修科。
高中必修科變動頻頻,早兩年通識科被修訂為公民與社會發展科,要求學生須到內地考察。唔單止咁,身兼教育工作者聯會會長嘅議員劉智鵬下周三(15日)喺立法會提出議員議案,建議將高中中國歷史科由選修改為必修,並改名做「中國歷史地理及文化科」。但係教聯會諮詢過會員教師,佢哋就唔想咁快有變動喎。
教聯會主席黃錦良話諮詢咗會員教師意見,普遍都唔同意將中史列為高中必修科,因為高中課程剛剛先完成改革,現在需要平靜嘅環境做好公社科,宜靜不宜動。佢話理解劉智鵬身為歷史學學者,對方提議將中史列為高中必修科,加強學生認識國家,絕對係應有之義。黃又話只要搞好兩地學界交流,讓本地學生能夠多元化學習,都可以學到歷史。
雖然議案都會員嘅意見唔一致,但劉智鵬話唔打算收回議案,又解釋議案喺舊年10月提交,當時自己都未加入教聯會。佢又話,其實大專學界好多人都撐將中史列為高中必修科,只係大家都認為需要時間做好相關教材,需時可能幾年先搞得掂。
佢仲話內地媒體製作咗大量精彩嘅紀錄片,好適合用嚟做教材,但要解決版權問題,例如有一套講辣椒點樣係內地傳播開來,可以從日常飲食角度出發,向學生講解中國嘅地理同歷史。唔單止教學生認識國家歷史,教聯會轄下嘅愛國教育支援中心未來會升級,同內地航天界別合作,設立高科技展室,介紹國家科技發展成果。會務亦會加強,例如提供中西醫服務俾會員教師。