政Whats噏：家務助理被誤解　林振昇：絕對唔係下人

現時香港唔少「雙職家庭」，即係父母需要同時外出工作，就因為忙於工作，所以要搵人幫手，處理吓啲「家頭細務」。依家啲家務助理好搶手，尤其係過年前，之不過，原來以前有啲人就認為家務助理嘅工作係做下人，所以無人入行。工會出身嘅議員林振昇就覺得家務助理畀人誤解咗，仲話絕對唔係下人。

話說林振昇近日接受訪問嘅時候，憶起自己以往喺勞聯初頭嘅經歷。佢話開頭係擔任「進修中心主任」，負責籌辦再培訓課程，而「學生」係一班中年人士。喺當時報讀「家務助理」課程的學員入面，唔少人都覺得家務助理等於做下人，於是佢就同學員解說，話家務助理嘅工作係對現代家庭很重要嘅職業，絕對唔係下人，改變佢哋嘅誤解。後來，見到班學員建立起自信心，喺崗位上愈做愈好，佢都感受到教學嘅意義，仲得到好大嘅滿足感添！

林振昇原來唔單止同教育有緣，仲與佛有緣添！原來佢細細個就喺佛教學校讀書，而喺讀書時學到嘅佛理，亦幫到佢去解決喺工作同生活上遇到嘅問題，仲令佢學識唔好咁執着。