政Whats噏：繫獄2年黃之鋒有感　能為明天憂慮已難能可貴

被還押嘅前香港眾志秘書長黃之鋒今日(28日)喺社交平台貼文，講述兩年獄中生涯嘅感受，佢話仲記得有啲人喺關心同勸勉在囚人士時，總會講句「唔好為明天憂慮」，但佢認為能夠為明天憂慮，反而喺監獄嘅氛圍裏已經係難能可貴。

黃之鋒因初選案涉違《港區國安法》，被控「串謀顛覆國家政權罪」，現仍被還押。佢喺貼文中話當自己置身於監獄內，身外物所剩無幾，確實會分外赤裸地呈現出每個人有唔同嘅寄託，例如書籍、報刊、新聞，睇電視同聽電台節目，都有唔同嘅選擇，亦以呢啲習性去同人溝通，所以若果對外間無欲求，又或者對人事同情感冇想像同期望，自不然亦都唔會為明天憂慮，呢種先係至為煎熬嘅境況。

要維持精持意志同健康，佢認為要保持對外間世情嘅好奇同唔好令自己對任何事情同話題嘅熱情熄滅，亦要諗下「可以為明天憂慮」嘅可貴之處喺邊度？佢認為意會「與明天的憂慮共存」對未來依然抱有想像，係值得肯定，同時亦不至於憂慮得太多，以致過於放大不安同忐忑，甚或被其吞噬。唔知有幾多在囚者有同感呢？