政Whats噏：難忘朋友江湖救急　黃傑龍心愛口罩唔捨得用

曾經係出街必備嘅口罩，依家已被好多人打入冷宮，然而環境運動委員會主席黃傑龍，就對過去全民搶購口罩嘅日子記憶猶新，仲要對備存家中嘅口罩念念不忘。莫非接近3年嘅疫情，佢唔想飛甩口罩？

黃傑龍喺社交平台貼文，話睇返昔日嘅新聞片段，好多人往往排隊幾個鐘頭都買唔到一個口罩，而佢間公司嘅人事部同採購部更需四出張羅，設法滿足員工每日開工嘅口罩需求；而就喺口罩供應緊張之際，全賴一位營運社企嘅好朋友江湖救急，令佢得以有4萬個口罩在手，以便向員工分發。佢話對方雖然叮囑，唔好講佢係邊個；但都想藉住撤銷口罩令嘅當下，公開向對方表示無盡感激。

講起朋友幫手，黃傑龍話自己嘅口罩主要係朋友送贈，而當中嘅高達、紅彗星同黃金戰士等口罩佢實在喜歡，一直都唔捨得用，結果擺到依家就唔使用啦！所以佢認為，有咩好嘢應該用咗先，否則去到最後只餘追憶。