政Whats噏：議會組團考察　陳克勤話分批上

議員組團出外考察都唔係新鮮事，隨住疫情逐漸平息、同內地全面通關之後，考察嘅事就可以提上議程啦！而今日（3日），身兼行會成員嘅議員陳克勤就話，依家安排緊全體立法會議員到訪大灣區城市嘅細節喎，唔知佢哋要去做咩呢？

陳克勤表示，特首會連同全體議員先到廣州同省市領導會面，之後各個議員會再按唔同範疇，例如醫療、環保、金融、創科等，分為幾團到不同城市考察，佢話咁做相信對兩地經濟同政治民生等方面，都有很大象徵意義。

政府近年就話要大力發展新能源車輛，其實深圳的士同巴士已轉為電動化，陳克勤就覺得過去幾屆政府使咗差唔多2、3百億，換老舊柴油車、貨車，但其實對路邊空氣質素改善唔係太大，主要原因係好多廢氣來自公共交通工具，所以佢認為香港可以借鑒深圳、而且表示政府可以加快開展氫燃料電池雙層巴士及重型車輛試驗嘅步伐，仲話政府可以參考內地嘅環保政策，而內地轉廢為能設施同技術先進，覺得議員都可以去參觀，帶動民間同商界加強交流咁話。