政Whats噏：梁熙牛一畀女圍　邊個係頭號女神？

今日既係3.8婦女節，咁啱亦係議員梁熙38歲嘅生日。遇上人生只得一次咁難得嘅日子，當然要搞派對慶祝一下啦！佢仲邀請所屬政黨嘅港島東團隊女士們一齊派心心。雖則話有眾美相伴，今次嘅生日過得特別難忘，但佢都仍然記掛另一位女士，仲形容為「頭號女神」添！究竟係邊個呢？

梁熙喺社交平台貼文，話「頭號女神」就係佢媽媽，話相當感謝38年前嘅婦女節忍痛誕下咗佢，令佢嘅生日特別易記之餘，當眾人慶祝婦女節時，亦會為佢呢位男士慶祝生日。不過，佢亦補充話自己嘅生日，其實亦都係偉大媽媽嘅「受難日」。但無論如何，佢嘅生日願望係希望一眾女神美艷動人，身體健康。

儘管又大一歲，距離不惑之年愈嚟愈近，但梁熙話今早同香港大學一班內地學生交流，期間受到佢哋嘅青春氣息感染，覺得自己好似後生咗10年咁話。