政Whats噏：林素蔚做社工　關母校事？

一個人嘅成長離唔開學校，好多人都會喺學校搵到自己嘅夢想，作為註冊社工嘅議員林素蔚（Connie）唔經唔覺已經離開母校18年啦，尋日（11日）就返母校培道中學出席135周年校慶，仲講咗大個會做社工嘅原因添！

Connie話由細到大都唔係最精英嘅一群，讀書又唔叻，雖然係咁，但讀書期間佢嘅老師都推薦去參加領袖訓練計劃，自此佢就「認識自己，發現了愛服侍人的心」，從而踏上社工之路。Connie又鼓勵師妹，叫佢哋無論喺邊個崗位都要「毋忘初心，以愛服務人」咁話。

唔單止贈言畀師妹，Connie都收到唔少有新意嘅禮物，好似由母校老師研發嘅校歌鋼琴音樂盒禮物；關注將軍澳議題嘅佢，仲收到住喺日出康城嘅培道師姐送上居民簽名打氣卡同禮物添！