政Whats噏：鄧飛赴菲律賓搶學生　叫港府加大力度做配套

呢幾年唔少港人移民，加上出生率低，適齡學童大減令本地教育界機構亦有殺校嘅危機。身兼教聯會副會長嘅選委界議員鄧飛早前就建議引入外來學生來港撐場，而日前更直情飛咗去菲律賓搶學生。

鄧飛當時都講過話香港可以吸引內地同東南亞嘅學生。日前佢就聯同培僑中學校長伍煥杰、教聯會總幹事崔劍等去菲律賓，3日行程內會拜訪當地華僑團體同教育界，例如菲律濱華文學校聯合會等，宣傳同推廣香港嘅教育，期望吸引當地學生，嚟香港升學進修。

之但係，好似吸引外來人才咁，都要有配套設施先得，住屋就係最大嘅需求，而外來學生都係一樣。鄧飛認為政府亦應該喺政策同留學生嘅配套上加大力度作出配合，不論係適應協助或者係學生宿舍宿位，都應該貼地設想，到位執行，咁先可以發揮香港教育優勢。

菲律濱華文學校聯合會，與在菲教育同工互相交流兩地的教育現況。