政Whats噏:煮麵加蛋多收50蚊 陳學鋒細仔被讚識搵老竇笨

2023年03月23日 19:04
東網電視
更多新聞短片
陳學鋒話細仔煮麵畀佢食。
依家乜嘢都加,基層市民真係好難捱,有保安員都話貴到唔敢去茶餐廳食飯。不過,議員陳學鋒日前有囝囝煮麵畀佢食,不過加咗隻蛋,竟然要加50蚊,仲話收平咗佢嘞!有網民讚佢細仔「叻仔,識搵老竇笨」。
陳學鋒尋日(22日)喺社交平台上載咗張湯麵相,貼文話放工返屋企無嘢食,細仔即時話煮個麵比佢食仲話加隻蛋添。咁當然好開心喇,但細仔話加蛋要加50蚊,仲解釋話隻蛋原價100蚊,畀咗個半價佢。
嘩!一隻蛋50蚊,仲有冇貴啲?但陳學鋒就話「其實加100蚊都無所謂啦!橫掂我已經好開心咁食啦!」梗係喇,好多網友都話碗麵應該係甜嘅,事關係愛心麵,簡直甜入心喇!亦有網友讚佢細仔「叻仔,識搵老竇笨」、「佢好有生意頭腦啊!」
但亦有網民好認真咁話「各項公共開支好大,政府完全不理會,這個政府完全不體察、不人道!」好明顯係因為最近乜嘢都加,令呢位網民先有咁大反應。