政Whats噏：正副主席冇影　教委會差啲停擺　梁美芬點解畫？

咪以為無咗泛民主派議員，議會就會乜事都冇，今日(24日)朝早立法會教育事務委員會差啲停擺呀！

話說教育事務委員會今朝10點45分開波，首個議程係討論特殊學校運作，教育局嘅官員準時赴會，但主席梁美芬同副席鄧飛都唔見人，冇人主持會議，點開？其他出席嘅議員面面相覷，都唔知點算好？後來決定由與會最資深嘅議員做代主席。

點知呢位代主席只可以逗留片刻，跟住就話要趕下場，必須再搵人接手。再數下一個最資深議員就係葉劉淑儀，但係佢亦都話要走，仲要早過代主席幾分鐘鬆人添！

咁仲有邊個可以替補呢？再數落去就係陳振英嘞！而就喺代主席離場嗰刻，梁美芬就到場，足足遲咗13分鐘，咁嘅形勢，佢拿拿臨坐落主席位，主持會議喇！冇耐，鄧飛都到場嘞！

做主席都遲到？梁美芬向傳媒解畫，話今朝有地區分享會，10點30分喺九龍離開，先前已講咗今日會略有延誤，佢仲話鄧飛亦預告今日有活動，所以由議會資歷最深嘅議員暫代主席喎。