政Whats噏:逛東日街巿遇生魚跳出 葉劉讚夠生猛

2023年03月25日 18:32
東網電視
更多新聞短片
葉劉行經魚檔,咁啱有一條生魚喺魚缸裏面一躍而出。
議員要貼近民情,就要出得議事堂,又要入得菜市場。身兼行政會議召集人嘅議員葉劉淑儀,尋日(24日)應邀出席東涌東日街市嘅啟用典禮。喺掲幕儀式之後,循例都要參觀一下街市嘅設施,而當佢行經一個魚檔嘅時候,目睹一條生魚喺魚缸裏面一躍而出,佢即刻大讚夠生猛!之不過,佢有冇幫手執番條魚呢?
唔止生魚夠生猛,其他貨品都好新鮮,葉劉就幫襯一生果檔購買兩箱「淡雪」士多啤梨,話90蚊嘅售價非常便宜喎。
其實喺呢個街市啟用前,苦於社區設施不足嘅東涌居民只有光顧由領展經營嘅街市,欠選擇之餘價格仲好昂貴添!結果喺街坊同地區組織多番爭取下,食物環境衞生署以臨時街市嘅形式,嚟紓緩街坊買餸難嘅問題。雖然唔係永久性,但葉劉相信呢個臨時街市,會存在一段極長嘅時間。
雖則葉劉唔係東涌嘅街坊,但有關東日街市嘅資訊,佢都知之甚詳,形容裏面麻雀雖小五臟俱全,乾濕貨應有盡有,但唯獨暫時欠缺燒臘檔咁話。