政Whats噏：盧偉國同汪阿姐同台　唱秋官名曲

喺議事堂當中，唔單止有新冒起嘅「立會男團」，仲有識玩好多樂器兼唱得嘅工程界議員盧偉國(WK)，佢日前仲喺中樂團嘅伴奏下，獨唱3首秋官(鄭少秋)嘅金曲。點解揀秋官嘅歌？

眾所周知，WK識吹色士風，又識彈琵琶，真係多才多藝。佢尋晚(25日)就為中樂團嘅籌款晚會獻唱，唱咗由顧嘉煇作曲，秋官主唱嘅《無敵是最寂寞》、《書劍恩仇錄》同《黃帝子孫》。佢揀呢幾首歌唔通係因為同台演出嘅係汪明荃？畢竟秋官同汪阿姐係銀壇好拍檔，過去兩人合作拍過唔少劇集。

其實呢個籌款晚會係汪阿姐主打嘅，WK話係第二次參加汪阿姐牽頭嘅呢個系列音樂會，同香港中樂團再度合作，感到好興奮。佢又話尋晚座無虛席，疫情令港人嘅工作同生活都大受影響，經歷3載煎熬，如今終於復常，能夠無拘無束咁參與音樂會，無論台上嘅演出者與台下嘅觀眾，都特別開心、特別熱烈喎。