政Whats噏：陳岳鵬向三項鐵人賽進發　為踩單車要早起

3年疫情，唔少人嘅腰圍隨同年齡一齊增長，政制及內地事務局前副局長陳岳鵬非但無肥到，體能仲好咗添！好到會向三項鐵人賽進發，重點針對弱項，勤練踩單車，仲有要早啲起身。點解要早起？

話說三項鐵人，係指游水、跑步、踩單車。向來都有練習前兩項運動嘅陳岳鵬，喺朋友鼓勵下買咗部單車，但要踏入鐵人嘅門檻，仲需要一個師父。幸運嘅係，有「香港首席鐵人」之稱嘅李致和，其師弟Alan喺舊年擔任陳岳鵬嘅教練，三鐵訓練由此正式展開，期間更參加多場比賽，結果中國香港三項鐵人總會日前宣布佢得獎，喺所屬年齡組別排第二，可謂喜出望外。

然而，陳岳鵬今次嘅獎項，只係游水同跑步嘅「水陸兩項鐵人」，並唔包括佢嘅弱項踩單車，所以佢話今年嘅目標係會針對單車項目，以積極備戰11月喺澳洲墨爾本舉行嘅70.3鐵人賽。之但係，香港嘅道路非常繁忙，要練習踩單車宜把握上班前嘅清晨時段，咁就難免就要早啲起床啦！