政Whats噏：葉劉促停向Google買廣告　當局回覆：認真考慮

鑑於香港代表隊在外作賽接二連三發生播錯國歌事件，身兼行政會議員成員嘅議員葉劉淑儀早前要求港府停止向Google買廣告，佢話政府覆信話當局就包括含國歌內容嘅網頁進行優化，相關網頁喺搜尋結果首頁位置顯著提升，當中並唔涉及向Google付費購買廣告，而當局亦會認真考慮唔喺Google買廣告。

葉劉喺社交平台上載咗創新科技及工業局嘅回覆，當局話政府科技資訊總監辦公室，一直喺技術層面為特區政府包含國歌內容嘅網頁進行優化搜尋工作，改進有國歌正確資訊網頁喺搜尋結果嘅排序，而經過3個幾月嘅持續操作，相關網頁喺搜尋結果首頁位置顯著提升。

由於Google唔肯移除錯誤訊息，葉劉早前要求港府唔好向Google買廣告，當局就話會認真考慮，同時會繼續跟進有關情況，喺技術層面持續進行優化工作，另一方面政府亦會加強宣傳，建議公眾參閱政府網頁，取得準確資訊。