政Whats噏：林素蔚濟南賞櫻　遊大明湖照片暴露年齡

要欣賞櫻花盛開、漫天緋紅嘅絢爛美景，唔一定要去日本。正身處濟南嘅新界東南直選議員林素蔚，就喺和煦嘅春風之下飽覽綻放嘅櫻花，仲影埋相上載社交平台公諸同好添！但見佢背後有一棵櫻花樹連同中式庭園，咁清幽雅致嘅地方，到底係濟南嘅邊一處呢？

答案開估，係趵突泉。話說有「泉城」之稱嘅濟南有幾十處泉眼，而趵突泉就係排首位，更被乾隆帝形容為「天下第一泉」添，當然亦係濟南嘅象徵。踏足趵突泉嘅林素蔚，旋即被內裏嘅迷人景致所吸引，尤其是庭園嘅櫻花樹。佢話見到咁靚嘅花景，都忍唔住高歌喎，只爭在未懂得示愛咁話。

儘管濟南唔係港人旅遊或公幹嘅熱門地點，然而過去因《我看大明湖》被列為會考範文嘅關係，唔少港人即使未去過，都聽過大明湖呢個濟南名勝。可能林素蔚有見及此，「同場加映」佢遊覽大明湖嘅相片。之不過，會考都無咗好多年，難怪佢話暴露年齡啦！