政Whats噏：大灣區考察確實日子及形式未定　議員表示擔憂

立法會議員來緊4月第三個禮拜就會一齊上大灣區考察，係疫情完咗之後立法會最大嘅考察活動，之不過，確實考察日子以及形式未定，今日（31日）喺內務委員會上有唔少議員都對是次考察表達「擔憂」。

議員狄志遠就話，今次考察由特首帶隊，層次咁高，希望可以唔止影影相、打下招呼，而係可以啟動香港同大灣區合作，好似退休人士到大灣區安老嘅安排咁，又話今次考察冇具體時間，對議員們嘅安排都有困擾。議員張欣宇都對考察日子表示關注，仲問到是否能夠喺24號之前完結。內會主席就話察悉，不過日子都係要等相關方面做最後通報，而暫時可以公開嘅資料得咁多。

議員葉劉淑儀亦詢問是否要出席全個行程，考察費用點計？內會主席就話會計入各個議員自己嘅外訪開支。疫情幾年，大家由於冇得北上，回鄉證可能都過晒期，作為旅遊業界嘅議員姚柏良臨走前就「溫馨提示」，着大家快啲整回鄉證，內會主席都話立法會秘書處係冇回鄉證快隊，所以議員們都要自己盡快去換領啦！