政Whats噏：容海恩話靈異節目導人迷信　憂年輕人玩巫術

靈異節目非常刺激同吸睛，依家有唔少年輕人都鍾意睇，但呢件事就引起議員關注喎。議員容海恩今（3日）喺立法會資訊科技及廣播事務委員會會議上就話自己收到投訴，指呢啲節目係「鼓勵人迷信」，仲會引起年輕人模仿添！

當局喺中期檢討建議將7大類指定播放節目整合為五類，即係新聞、時事、兒童、青年人同「其他節目」。而容海恩就關注靈異節目啦，佢話靈異節目係「鼓勵人迷信」、「鼓勵年輕人試巫術同蠱術」，又質疑呢啲節目係咪「導人向善」、對社會有正面影響，而且好多宗教團隊反對咁話。

商務及經濟發展局副局長陳百里回覆時話，靈異節目並唔屬於指定廣播節目，而「廣播投訴委員會」有恒常嘅投訴機制，佢哋接到投訴會認真處理每1個個案，唔單止中期檢討，當局都進入廣播業務守則檢討，預計會喺2024年年頭完成。