政Whats噏：陳克勤拉戴尚誠落區　劏房戶憂過渡屋交通配套差

今屆政府話要解決市民居住喺不適切居所嘅問題，前前後後都推出咗唔少計劃，好似過渡性房屋、簡約公屋咁，但呢啲臨時性住屋嘅配套夠唔夠就一直為人質疑，議員陳克勤都好關注大埔汀角路黃魚灘過渡性房屋計劃，今日（10日）拉埋房屋局副局長戴尚誠落區，希望政府可以解決下交通配套問題添！

陳克勤話，其實居住喺不適切居所嘅家庭都好期望可以改善佢哋同下一代嘅生活環境，令下一代可以更好咁成長，但針對汀角路黃魚灘過渡性房屋計劃，佢哋就好擔憂選址嘅交通配套問題，驚出入唔方便咁話。

其實改善交通配套，唔單止係令要搬入去嘅家庭受惠，原本附近一帶居民都可以得益，陳克勤話，期望副局長落區聆聽市民心聲後，將佢哋嘅意見帶入政府，喺規劃過渡性房屋計劃時，更能貼心幫助市民喎。