政Whats噏：香港仔街巿翻新今重啟　陳家珮專程去買餸

作為「街市現代化計劃」首個項目嘅香港仔街市，重啟日期一拖再拖後，今日(26日)終於開始分階段投入服務。議員陳家珮係南區嘅街坊，亦都趁立法會開完會之後，同埋兩位黨友專程去買餸，話要親身體驗新街市嘅氣氛喎。到底佢對翻新後嘅街市有咩評價呢？

香港仔街市今日約有80個攤檔投入服務，陳家珮話確實畀到大家耳目一新嘅感覺。佢話去到街市嘅時候，雖然已經六點幾，但人流都仲係好多。佢話經過重新規劃之後，街市內嘅空間確實比起以前寬闊好多，行得相當舒服，況且入面仲有好多新設施，佢相信隨住更多檔商開業，翻新後嘅街市大樓將會成為香港仔嘅新熱點咁話。

陳家珮行經菜檔，話依家可以用八達通畀錢買餸，非常方便。之不過，生菜同油麥菜賣成12元1斤，菜價會唔會較翻新工程前貴咗呢？相信買要開餸嘅主婦先至知啦！