政Whats噏:易志明修訂三隧分流草案 倡的士在內商用車降至$20
政府早前提出三隧分流方案,立法會亦正審議相關嘅修例草案。航運及交通界議員易志明早前質疑的士隧道費較私家車高,變相鼓勵市民坐白牌車,日前率先提出修訂,要求包括的士在內嘅商用車輛同非繁忙時段嘅私家車收費看齊,即係3條隧道劃一每日固定收費下調為20港元。
易志明日前去信草案委員會主席,解釋提出修訂嘅理據。佢話政府建議使用3條隧道嘅私家車,喺非繁忙時段收取20港元,的士則需收取25港元,即係畀私家車收費高5港元;若果市民喺非過海的士站上車過海,需要畀來回隧道費合共50港元,但坐白牌車只需一程嘅隧道費20港元,變相鼓勵市民搭白牌車。潛台詞就係白牌車搶生意喇!
對於政府建議將公共小型巴士(紅色小巴)、公共巴士(非專營巴士)同指定商用車輛嘅收費調整為全日劃一50港元,易志明話依家嘅邨巴、旅遊巴同校巴等非專營巴士,因為種種理由而以行走紅隧為主,譬如旅遊巴集中喺紅隧穿梭港九嘅景點同酒店,若果小巴同單層巴士通過紅隧嘅收費由10港元大幅增至50港元,經營成本必然大增,紅色小巴就算可以隨時調整收費,亦只會加劇車資嘅負擔,甚或導致乘客流失,有違政府鼓勵市民乘搭公共交通嘅原則。
易志明又提到,政府當初話載客量高或載貨量高嘅車種,可享較低隧道收費嘅主張似乎已經放棄咗;而政府建議嘅3隧新收費,只會令學童巴士同重型車輛業界嘅經營更加困難。既然私家車喺非繁忙時段只收20港元,佢就修訂草案將包括的士在內嘅商用車輛,隧道收費一律下調至20港元。
話時話,議員提出嘅修訂需要分組投票,喺選舉委員會界別、功能界別同地區直選等3組都獲得逾半支持,先可以獲得通過,係有相當嘅難到度。但業界確實對收費有好大嘅反彈,唔知見到易志明嘅舉動,政府會唔會聽從民意,改為主動修訂草案呢?