政Whats噏：旅险从业员流失　姚柏良促保监局以资历代学历

香港旅游业喺疫下冰封3年，唔单止好多导游转咗行，旅游保险代理都有流失，加上保险业监管局早年更改旅游保险代理嘅资历要求，令业界喺销售旅游保险遇上一定困难。旅游界议员姚柏良最近就联同身兼行政会议成员嘅保险界议员陈健波约见保监局，希望当局可以放宽安排。

为咗旅客喺旅途上有更全面嘅保障，旅游业界一般都会建议旅客买旅游保险，而售卖旅游保险嘅旅行社都必须有旅游保险代理商负责人(RO)同旅游保险代理，先可以销售旅游保险。但喺2019年起，保监局实施新嘅监管同发牌制度，修订咗对旅游保险代理商负责人同旅游保险代理嘅资历要求。喺新安排下RO需要拥有学士学位、具备至少5年旅游代理业务嘅经验，仲要包括至少2年管理经验，而旅游保险代理就需要DSE5科达到2级或以上成绩，包括中文或英文同埋数学。

姚柏良就话收到业界反映，依家唔少有经验嘅RO同旅游保险代理出现流失，喺销售旅游保险上有一定困难，所以希望保监局喺处理业界申请嘅时候，尽量畀酌情权，容许佢哋以资历代替学历，以减低业界做RO嘅难度，等佢哋可以易啲卖旅游保险。