政Whats噏:黃錦星重返中學母校 形容女班長「稀有品種」

2023年05月26日 19:16
東網電視
更多新聞短片
黃錦星(戴帽者)返回母校班房與同學聚舊。
昔日嘅同窗即使各奔前程,但都會把握機會聚首一堂。繼早前返回童年成長嘅沙田拗邨緬懷過去,前環境局局長黃錦星日前又到訪位於慈雲山嘅中學母校,重回當年嘅班房與闊別40年嘅預科同學聚舊,期間佢更形容其中一人係「稀有品種」添,莫非呢位舊同學係天賦異稟、不世之才?
黃錦星所指嘅「稀有品種」,其實係女班長。佢話那些年讀理科都係男生居多,有女生入讀仲要做埋班長,喺以前嘅年代較為少見。唔知青少年時期嘅黃錦星,與女班長同窗讀書會否特別落力?但無論點都好,女班長都係跟返當年嘅座位,坐返前排。事後,黃錦星向母校送贈講述到遍遠山區服務嘅書籍,冀學弟學妹開拓視野,支持社會可持續發展。黃錦星又話多謝母校春風化雨,佢同舊同學都十分感恩。
喺重返中學母校之前,黃錦星先到訪去年遷入秀茂坪新校舍嘅一所中學,事關呢間學校嘅賴校長係佢當年預科班嘅同學。本業係建築師嘅黃錦星,大讚新校舍平實好用,內外設施多元令人眼前一亮,設計通爽通光環保令學生受惠。