政Whats噏：堅持不易　張美雄採取彈性素食

打工仔搵食難，茹素嘅打工仔，搵食更難。有素食習慣嘅西貢區議員張美雄就話，喺香港食素並唔容易，一來素食餐廳少，二來即使有，但都偏向油膩，又或者好貴。譬如今日(26日)佢幫襯一個素食早餐，埋單差唔多要150蚊，慨嘆餐餐咁食真係難以負擔。

張美雄食素並無特別理由，只係覺得如非必要，毋須以其他生物嘅生命來維持自己嘅生命，所以大魚大肉以滿足口腹之欲，並非佢嘅主張。四前年因家人身故，張美雄就開始順勢食素，而自細就腸胃欠佳嘅老毛病亦有所改善。佢話食素初期係好堅持，但後來發現打工仔要堅持素食並唔現實，於是佢就調整一下，改為一星期兩次食素，因日子並非固定，因此仍可出席應酬宴會，亦儘量減低家人朋友同枱食飯所遇到嘅麻煩。

由於規條設得寬鬆，張美雄話若果遇到葷食嘅場合，亦會毫不猶豫咁起筷以免浪費食物。佢話做人做事，有時不妨「佛系」一啲，儘力爭取但無須強求，總之開心就好。