政Whats噏:街坊仍嗌議員 麥美娟:都係一句啫

2023年05月27日 13:24
東網電視
更多新聞短片
麥美娟趁空檔返去以前服務嘅社區。
新一屆政府上任差不多一年,但睇嚟市民對眾多局長嘅印象未係好深刻。好似民政及青年事務局局長麥美娟(Alice)咁,落去佢以前服務過嘅社區,班街坊仍然係叫佢「麥議員」。
Alice喺社交平台貼文,話今日(27日)趁有空檔返去熟悉嘅社區,仲去到區內老字號茶餐廳買至愛嘅椰絲奶油包做午餐。咁啱路過巴士站,候車嘅乘客同佢打招呼:「麥議員,你買嘢呀?」再行前又有個街坊:「麥小姐,記唔記得我住安蔭邨呀?」
行到茶餐廳買麵包時,茶餐廳老闆問:「你今日放假呀?」當佢買完麵包轉身走嘅時候,有個婆婆路過話:「喂麥美娟喎,你做咩食麵包唔食飯呀,幾忙都正經食餐飯啦!」之後當Alice上車時,就帶咗一大袋麵包、糯米糍嘞!仲有,佢話係滿滿嘅街坊情,社區情。
之但係,冇街坊叫Alice做麥局長喎。可能佢都察覺呢點,喺貼文最後嗰段話「無論街坊稱呼我麥議員、麥小姐、麥美娟、麥局長,其實都係一句啫,我仍是我,最緊要『幫到你』!」又真係好難講嘅,佢做過葵青委任區議員、直選區議員同立法會新界西直選議員,做過咁耐地區工作,班街坊可能一時改唔到口都唔奇。