政Whats噏：兩工會葵涌開聯合議辦　陳穎欣林振昇拍住上

地區直選同選舉委員界議員服務對象唔同，竟然可以合作！事關佢哋都喺嚟自工會，雖然所屬唔同工會，但幫嘅同樣係打工仔。

嚟自工聯會嘅新界西南直選議員陳穎欣，同埋嚟自勞聯嘅選委會界別議員林振昇，佢哋喺葵涌石籬邨嘅聯合辦事處今日(27日)開幕。陳穎欣話兩個工會多年嚟一直在爭取勞工權益議題上合作，推動政府創新勞工政策思維，加強保障打工仔女權益，所以今次合作開設辦事處可謂一拍即合，況且今次係佢首次同其他界別議員合辦聯合開設地區辦事處，別具意義。

陳穎欣又話，雖然佢同林振昇以唔同嘅產生辦法進入議會，但透過合作，既更有效地服務市民，亦有助切實排解民生憂難，佢希望透過增設更多服務點，推動社區發展，喺議會內外同網絡平台繼續努力。

林振昇就話儘管佢唔係嚟自地區直選，同葵涌區亦睇落冇乜關連，但其實勞聯喺葵芳設有進修中心，一直都好關注葵涌區嘅地區發展，佢話會同陳穎欣一齊拍住上，更好咁服務市民。