政Whats噏：劉震話全運會有群眾「運動」　鄧飛指正「體育」先啱

錯誤翻譯或一時口誤都可能會帶來歧義，今日立法會（31日）進行人事編制小組委員會會議議程，講緊加職位去全運會同啟德體育園嘅籌備進度時，文化體育及旅遊局副局長劉震誤將「群眾項目」講咗成「群眾運動」，有議員就好心「提點」叫當局小心字眼啦！

事緣旅遊界議員姚柏良問文體旅局點樣帶動香港嘅體育氣氛，劉震就答話全運會有「群眾運動」帶來廣泛參與。呢個字眼成個議程都冇人留意到可能有歧義，但到咗下一個議程，曾做過中學校長嘅議員鄧飛就指出問題之處。

鄧飛話「群眾運動」有第二個意思，劉震嘅意思應該係「群眾體育」，叫當局小心啲字眼，事關「Critical thinking」當年翻譯成為「批判性思考」，令到啲人淨係識「批判」咁話，佢話「因名而起嘅爭議無謂再犯」喎。

聽罷，劉震就話多謝鄧飛提點，承認係「一時口快」，之前一路都係講緊「群眾項目」咁話。希望劉震澄清完就唔會引起歧義啦！