政Whats噏：劉業強連任鄉議局主席　莫錦貴擊敗林奕權衞冕副主席

新界鄉議局今日(1日)下晝進行四年一度嘅換屆選舉，鄉議局現任主席劉業強、兩位副主席林偉強及莫錦貴，再度參選競逐連任。而上屆都有參選嘅大埔鄉事委員會主席林奕權，今次亦再度參選。結果劉業強、林偉強同莫錦貴皆成功連任。

由於每一個約(元朗約、大埔約和南約)，只能有1位主席和副主席。來自元朗約嘅劉業強同南約嘅林偉強，喺未有其他候選人嘅情況下，分別自動連任主席同副主席。而由於大埔約出現兩位候選人，分別為莫錦貴同林奕權，所以需要進行選舉。

林奕權回覆東網查詢時話，自己對今次選舉都係以「平常心」面對，但有盡全力喎。被問到有冇為今次選舉「拉票」，佢話自己都係做番原先嘅工作喎。

點票嘅結果，係莫錦貴獲71票，成功連任，林奕權55票落選。對比上屆選戰，當時取得58票嘅莫錦貴以1票之微擊敗取得57票嘅林奕權，今次莫、林兩人所獲選票嘅距離無疑係拉大咗。有鄉議局中人喺選前預測，以現時嘅政治環境，鄉議局最重要係穩定，指「一動不如一靜」，預計原先是副主席嘅莫錦貴應該可以繼續連任，而後生仔就繼續學下嘢先喎。

順利連任嘅劉業強指工作任重道遠，形容「選舉有競爭」，所以對選制有信心。劉又指未來有北部都會發展，「三鐵三路」工程鄉民令感受到好多壓力，認為影響一定有，但期望鄉民顧全大局，政府亦要做好協調工作，同時要安置好棕地作業者。

被問及放寬祖堂地門檻，劉業強相信今屆政府會着手處理相開工作，同時盡快籌開大型諮詢會，又指祖堂地工作重大「唔希望急住去做」。