政Whats噏：9議員聯署　內會轄下成立小組委員會　研究人口政策

香港出生率下降、老年人口愈來愈多，但政府好似冇咩針對呢方面嘅政策，有9個議員日前就「聯署」，建議喺立法會內務委員會轄下成立小組委員會研究人口政策和措施，仲有議員話因為人口政策非常重要，想要「打尖」添！

9個議員分別係容海恩、梁毓偉、陳紹雄、林筱魯、陳穎欣、陳家珮、何敬康、陸瀚民以及鄧飛。但由於現時已經有10個研究政策事宜小組委員會運作緊，到咗上限，所以內會主席今日（2日）都話呢個小組委員會將排喺輪後名單首位，等到有空額時再開展工作。

議員李鎮強雖然冇聯署，但都好關心呢件事，認為政府好缺乏有關嘅規劃，希望可以「插到隊」，盡快成立小組委員會討論。議員梁美芬都希望討論內容可以「有執行性、精準」咁話。

可惜內會主席強調，未來將有多條重要法案審議，而且小組委員會已到上限，故最終結果都係同意成立小組委員會研究人口政策和措施，而且會排喺輪後名單首位，但就插唔到隊啦。