政Whats噏:葉劉淑儀訪古裝劇場地 歎內地影視突飛猛進

2023年06月03日 17:16
東網電視
更多新聞短片
葉劉淑儀話橫店影視城嘅戲服手工十分細緻。
近年內地影視發展蓬勃,身兼行政會議召集人嘅議員葉劉淑儀,日前就同黨友參觀浙江嘅橫店影視城,近距離觀看由春秋戰國以降,歷朝歷代嘅建築,而影視城內亦隨處可見各種不同嘅古裝扮相,如文質彬彬嘅書生、威武侍衞、包青天張龍趙虎。佢留意到本身係私人企業嘅橫店影視城,只需網上登記就可以免費租借場地使用,如何賺取收入呢?
葉劉指橫店影視城懂得創造收益項目,可以話財來自有方。首先影視城本身就係佔地極廣嘅主題公園,需要徵收入場費,而遊人可付費即場化妝同穿着戲服,拍攝屬於自己嘅短片或硬照作為珍藏;同時亦有許好多影視周邊產品可供選購,每個項目都係收入來源。佢引述工作人員嘅介紹,話橫店影視城現時提供6000多個就業職位,而人口約50萬嘅橫店鎮,人均收入就達到6萬元人民幣,由此可見由影視城衍生嘅就業機會相當可觀。
佢又指橫店影視城轄下開設好多子公司,匯聚大批編劇、導演、新進演員與影視有關嘅製作人才,而隨着多年來嘅發展,橫店影視城已形成一個非常龐大嘅產業。葉劉話內地影視產業發展一日千里,產量驚人,作品風靡各階層觀眾,而普及全球嘅軟實力,更不容小覷。