政Whats噏：狄志遠試軟餐　話老友記有啖好食

議員食「軟飯」？唔使大驚小怪，差一個字啫！係軟餐。講緊嘅係社福界議員狄志遠(Tik)呀！

講開軟餐，相信大家都知係專為老人家而設。阿Tik日前喺社交平台貼文，劈頭第一句就話正所謂民以食為天，跟住就提到長者，話年紀大咗無得周圍走，食已係老友記最大嘅娛樂。

由於有啲長者有吞燕困難，所以要食軟餐。阿Tik話記得以前返老人院舍，班老人家只可以食碎餐同糊餐 ，賣相極唔吸引，仲話當時佢都好傷心，點解老人家只可以接受呢種碎餐，無更多選擇？

實際上，為咗令老友記食好啲，唔少機構都花咗好多心思。正如阿Tik嗰日係去參觀柴灣保良局一點回味廚房，廚師煮咗好多唔同嘅軟餐出嚟，見到仲有糉添呀！而阿Tik喺係試菜之後就話個人感覺軟餐 色、香、味同形俱全，容易嘴嚼同吞嚥，十分推薦畀老友記，仲話要感謝機構真心願意為老友記着想，令老人院舍餐點唔只係為生存，而係享受生活。