政Whats噏：林琳生B　波波8個半月搶閘出世　似邊個？

BB出世喇！議員林琳嘅預產期喺7月，但係BB搶閘，8個半月就出世。林琳喺社交平台報喜，話老公覺得「波波」嘅額頭、下巴同眼似佢，眉毛同個嘴似老公，仲問大家又覺得波波似佢定似老公多啲呢？

林琳喺社交平台貼文話34周半嘅波波一出世就喊得好有氣力，Standby嘅兒科醫生都話好掂，證明波波嘅肺功能好得，唔使擔心，又形容波波出世就擘大個口，係個開心笑寶寶嚟。

情況嚟得好快，林琳話上個禮拜三開始無啦啦有假性宮縮，禮拜五睇咗醫生，叫佢多啲瞓床休息下。去到尋日(5日)下晝，主診醫生出完差返嚟即刻喺下晝見佢，亦都係建議休息下先。點知BB由尋晚8點開始，就唔畀爸爸媽媽瞓訓覺休息，係咁收縮直到4點半，佢終於頂唔順去咗醫院，而手術好順利。

林琳形容BB已經唔想再等，決定提早同爸爸、媽媽、各位Auntie同Uncle、哥哥、姐姐、爺爺同嫲嫲見面。