政Whats噏：容海恩慶生　撐足7日枱腳

慶祝生日，少不免都要擦番餐。議員容海恩(Eunice)今日(7日)迎嚟46歲生日，適逢立法會開大會，一眾議員黨友齊齊向佢送上生日祝賀。其實喺一個禮拜前，佢嘅慶生活動已經展開，就係晚晚同老公袁彌昌食飯，今晚都唔例外。

Eunice話由上星期四(1日)開始，佢就同老公「撐枱腳」，遍嘗城中各種菜色，當然都係老公負責埋單啦。至於挑選邊間食肆，咁傷腦筋嘅事亦都係留番畀老公。至於有冇話因應佢生日，老公捲起衣袖親自下廚？Eunice就話屋企咁多人，好難煮到好嘢，所以都係交畀出面煮啦，佢話反正老公最大嘅優點，就係搵餐廳！

被問到老公有冇送生日禮物畀佢？Eunice話對方即將出門前往日本，所以份禮物都係遲吓先喎。不過囡囡今早就送咗紮花畀佢，都算係生日禮物啦。