政Whats噏：包糉有神器？　陳克勤用2分半鐘搞掂1隻

就快到端午節，相信有唔少人都會提前包糉應吓節，議員陳克勤都唔例外，佢今日（11日）喺Facebook話自己到沙田區包糉送畀街坊，仲話用咗「包糉神器」添！究竟係咩神器咁犀利？

陳克勤話喺前沙田區議員董健莉等各個義工嘅「專業指導」下，加上「包糉神器」嘅協助，好輕易咁用2分30秒就完成一隻愛心糉，原來所謂嘅「包糉神器」係倒轉嘅沙漏形狀，所以使用者可以先用糉葉整好個形，再依次放入糯米同綠豆蓉。

原來今次係佢第二次包糉，第一次係喺上個禮拜同義工喺大埔包，而且個次因為冇用神器，所以包完嘅糉係扁嘅，好似舊番梘咁，所以佢就話有個神器就容易固定，今次終於可以整到三角形嘅糉，而且速度夠快咁話。