政Whats噏：梁美芬口快快　叫主席變主人

口誤就人人都有㗎啦，但有陣時叫錯嘢都幾尷尬吓。立法會今日（15日）繼續辯論中醫發展嘅動議，有議員本來都就嚟講完啦，但估唔到居然係臨尾嘅時候，竟然爆咗句「主人」出嚟。

話說梁美芬喺發言時講點樣推進中醫發展，但係臨尾嘅時候就出現甩轆嘅情況，先係將急起直追，講成急起「極」追。之後更加喺發言嘅最後，唔小心叫錯立法會主席梁君彥做「主人」。知道自己講錯咗嘅梁美芬，都即刻補番句主席，而隨住發言時間完結都即刻坐低，但梁君彥就冇反應，唔知聽到梁美芬咁叫自己，佢心入面有咩感受呢？

議員一時口快噏錯嘢時有發生，梁君彥都有前科，事關佢之前亦一度將議員簡慧敏誤稱為周慧敏。