政Whats噏：炎夏遊荔枝窩　葉建源食雪條消暑有驚喜

放得入口嘅「藝術品」大家試過未？教育界前議員葉建源參加本地遊，去到荔枝窩聽團友推介，話不可錯過當地售賣嘅雪條。起初佢覺得盛夏當前，雪條嘅吸引力當然可以理解，但有無非食不可咁嚴重呀？不過後來佢將雪條拎上手，就大呼所言非虛。

葉建源喺社交平台上載相片，形容自己手上嘅「紅球薑百香果雪條」係手工製造、非常漂亮，簡直係精心製作嘅藝術品，入口前可以欣賞，入口後美味冰涼！而雪條上端嘅淡紫色花係馬蘭頭，下端黃色係百花果，材料全屬真花、真草，兼且係自家種植，佢話估唔到荔枝窩嘅客家古村，竟然都有呢種消暑妙品喎。

至於咁靚嘅花花雪條，葉建源話仲有其他款式可以選擇。佢話食完雪條，再幫襯一樽鮮果茶，然後同店主吹吓水，咁就一次過滿足3個欲望！有網民留言表示羨慕，事關若非去到話賣晒，就係遇啱小店冇開門。