政Whats噏：邱達根參觀全自動化碼頭　反思香港「輝煌時代」

曾位居世界第一貨櫃港口嘅香港，排名不斷下滑。議員邱達根尋日(21日)參觀青島港全自動化貨櫃箱碼頭，目睹機械吊臂及無人駕駛車不斷運作，快速又寧靜，佢對全程自動化、高效操作十分佩服之餘，亦不禁想到自居國際物流中心嘅香港，可曾反思自己有冇進步？

邱達根係同葛珮帆、黃錦輝、尚海龍等議員同事到青島考察，而佢哋到訪嘅青島港全自動化貨櫃箱碼頭，屬全球首個裝卸效率超過人工碼頭嘅自動化碼頭，其作業效率較傳統碼頭提升30%，節省人力80%，更連續9次打破自己保持嘅貨櫃箱碼頭裝卸效率世界紀錄。另一方面，碼頭設計更首次將氫動力引入港口大型機械，每作業一個標準箱可減少二氧化碳排放約3.5公斤。

佢形容船上貨櫃移送至岸上貨櫃車或碼頭倉庫，過全程自動化，整個碼頭空無一人，由自動車及空中軌道運送所有嘅集裝箱。佢話每當我哋同人家講，香港係國際物流中心嘅時候，可曾反思自己有冇進步？還是幻想活在我哋過去嘅輝煌時代？