政Whats噏：社會復常　山頂驚現「隔離營」?

雖然疫情告一段落，竹篙灣社區隔離設施亦早已關閉，但點知山頂竟有「隔離營」正運作，早前仲有4條小生命喺裏面出現添！到底喺邊咩嚟呢？

議員陳健波(波哥)喺社交平台爆料，話日前應邀到政務司司長位於山頂白加道嘅官邸食飯，期間佢聽聞一個好有趣嘅消息，話說官邸有一個養咗十幾條錦鯉嘅魚池，而魚池旁邊另外有一個，專供染病錦鯉休養嘅水池，由於作用好比隔離營，故取名為「竹篙灣」。約莫一個月前，工作人員發現「竹篙灣」水池嘅濾水棉上面，有4粒豆豉咁大嘅錦鯉BB，經工作人員悉心照顧，4條錦鯉BB依家已經長大成小錦鯉，放番喺大池裏面同其他大錦鯉一齊生活，好生猛咁游來游去。

官邸所養嘅十幾條錦鯉雖有公有乸，但十幾年來都未嘗有小魚出生，波哥話今次4條新生錦鯉，就予人吉祥嘅徵兆；另外亦有人以「4點希望」嚟容新生錦鯉，分別係「團結」、「包容」、「繁榮」同「安定」咁話。