政Whats噏：考察農業科研成果　林健鋒冀年輕人投身航天事業

喺地上生長嘅大豆就見得多，但係「太空大豆」又有冇聽過？議員林健鋒(Jeffrey)今日(2日)去中大考察「太空大豆」計劃，並獲贈一批「太空大豆」嘅豆種。因相關豆種曾於去年隨神舟十六號一同被送上太空，並順利到達中國嘅天宮空間站，因此佢形容呢種大豆係「飛天豆」。

雖然「太空大豆」嘅外表同一般大豆無咩分別，不過Jeffrey指科學家為咗培育更具適應力、能減少使用化學氮肥連帶排放相關溫室氣體，特地研發呢啲耐鹽、耐旱嘅隴黃大豆品種。而今次「太空大豆」計劃，係香港首次參與太空農業科研，而領導中大團隊嘅林漢明教授就係香港土生土長嘅科學家，證明香港亦具有土壤培育國際科研人才。佢又希望林教授團隊取得嘅成就能引起社會對科研嘅關注，吸引更多年輕人投身航天事業。