政Whats噏：加租食材漲價　還押譚文豪合營食肆9.30結業

因涉民主派「35+」初選被還押嘅前公民黨副主席、前議員譚文豪，聯同香港中小企食店聯盟召集人林瑞華等人開設嘅食肆「一日三餐」，尋晚(9日)喺社交平台出通告，話雖然捱過咗疫情，但最近食材價格不斷上升，人手持續不足，經濟復甦步伐不似預期，而加租安排亦令經營倍添壓力，決定喺9月30日結業。

據稱，該食肆因被業主大幅加租25%，以10萬港元續租舖位。食肆嘅通告話為咗讓訂購咗中秋月餅嘅客人放心，同埋確保月餅如期取貨，食肆會短暫續約，9月30日將係餐廳嘅最後營業日，亦會喺結業時妥善照顧員工的需要。

前公民黨黨魁楊岳橋、譚文豪、前黨員郭家麒同李予信因捲入民主派初選案，被控違反《港區國安法》後宣布退黨。其後更向公民黨發出公開信，話該黨已完成歷史任務，為免有更多黨友陷於絕境，提出解散公民黨嘅建議。

公民黨喺今年5月初召開特別會員大會，喺逾四分之三黨員贊成嘅情況下，宣布進入清盤程序，並委任清盤人處理清盤事宜。